Lîsteya Hevpeymaniya Kurdistanê (LHK) li hemberî nebûna navên nêzî 65 hezar dengderên herêma Kurdistan û deverên cudabûyî nerazîbûna xwe nîşna da û li ser vê mijarê nameyeke nerazîbûnê ji Komîsyona Bilind ya Serbixwe ya Hilbijartinan re şand.

Lîsteya Hevpeymaniya Kurdistanê di nameya nerazîbûnê de diyar kir, piştî ku wan prosesa dengdanê ya hilbijartina parlamentoya Iraqê bi temamî şopand, aşker bû ku li sînorê parêzgeha Dihokê navên nêzî 20 hezar, li parêzgeha Hewlêr û qezaya Mexmûrê navên 43 hezar û li parêzgehên Silêmanî, Kerkûk, Diyale û deverên cudabûyî jî navên hejmareke zêde ya xelkê venegeriyaye û ji dengdanê bêpar mane.

Lîsteya Hevpeymaniya Kurdistanê di nameyê de tevî ku nerazîbûna xwe li hemerî vê yekê nîşan daye, wê çendê wek bûyerekê li dijî dengderên herêma Kurdistanê bi nav dike û tîne ziman ku ew yek helwesteke siyasî ye. Lewre LHK daxwaza daxuyanî û zanyariyan dike û çareseriyeke guncan ji bo vê meseleyê dixwaze.